執靚個陣三線Perfect
國際賽檔期後今晚英超重開，頭場就有場重量級賽事，熱刺主場對利物浦。利物浦係目前三支英超全勝球隊之一，論氣勢可用如日方中嚟形容，尤其係防線經過補強後唔再性感，狀態之佳真係無人能擋。反觀熱刺受國際賽病毒所累唔齊章，紅軍作客讓平半照捧。
（Now 621周六晚7時30分直播）
利物浦今季獲得4名新球員艾利臣比加、拿比基達、法賓奴泰華利斯及梳頓沙基利加盟，一致被認為係絕佳收購，尤其係門將艾利臣可解決紅軍多年來嘅後顧之憂，中場發電機拿比基達則可減輕防線壓力，加上上季季中加盟嘅高質中堅華基爾雲迪積克已融入球隊，今時今日嘅利物浦陣容已冇乜可挑剔嘅地方。
紅軍目前最可怕嘅地方係上季痛失歐聯，球員追求勝利嘅渴求感更強，呢一幅強大氣場，情況就好似法國痛失歐國盃後奪得世界盃咁，嗰種反彈力令佢哋季初表現極為勇猛，英超4連勝之餘僅失1球，比起上季可以話提升咗最少一個層次。
熱刺慘中國際賽病毒
另一邊廂熱刺以不變應萬變，新球季竟然冇新球員加盟，唔係話熱刺班波唔好，只係以佢哋目前班底同後備兵源，要稱霸英超真係有一定阻力，尤其係佢哋陣中國腳唔少，經過國際賽洗禮後隨時身心俱疲，喺兵源調動上熱刺絕對唔及其餘5支Big 6球隊。
熱刺今仗除咗隊長門將洛里斯及中場迪利阿里因傷肯定缺陣外，孫興民踢完世界盃同亞運後，再踢埋上星期嘅兩場國際賽真係戥佢辛苦，反觀利物浦今仗可夫添迎戰，去咗美國踢熱身賽嘅三名巴西兵都用專機回程，順利歸隊復操，無論人腳同狀態上都比熱刺優勝，作客讓波係信心嘅表現，一於照捧。
