雲達不來梅強鋒拆紐
正本戲雲達不來梅主場對升班球隊紐倫堡，不來梅季前重手入貨增添多名攻擊球員，又克服季初門將荒困難，演出同成績都比近季季初好，遇上質次一皮，仲適應緊德甲快速節奏嘅紐倫堡，力足取得今季首場德甲勝仗，不來梅主場讓半一問題唔大，黑柴捧上盤。
不來梅季前認真組軍，高價引入愛華頓嘅荷蘭國腳卡拉臣，漢諾威前鋒夏歷，多蒙特中場組織者紐尼沙軒，仲一口氣喺科隆簽入攻擊手大迫勇也同比沙路，配合陣中質高射手麥斯古斯，鋒力值得期待，佢地首仗壓住漢諾威踢最終只和波收場，但上輪作客法蘭克福，踢到補時6分鐘憑後勁絕殺對手，士氣大振，雖然今仗有新兵紐尼沙軒帶傷上陣成疑，但回師主場依然有足夠火力爭勝。
紐倫堡連仗遇弱冇睇頭
紐倫堡今季回升德甲，但財力所限冇大規模增兵，只有荷蘭中場域基利米斯迪贊同日本中場久保裕也較有份量，佢哋開季兩輪對手都偏弱，但首仗喺全場搶攻下不敵哈化柏林，上輪主場亦只能摸和另一護級分子緬恩斯，似乎仲未適應到德甲節奏，今晚作客火力更強嘅不來梅，難免處下風。
