今晚意甲連場好波，其中「1哥」嘅祖雲達斯喺主場迎戰薩斯索羅。葡萄牙萬人迷C朗今夏高調加盟祖記，以為嚟到意甲一樣玩晒，點知佢至今仲未開齋，呢位射手一向要面要威，但愈心急就愈入唔到波，加上佢哋今季都幾慢熱，撞正頂得兩嘴嘅薩斯索羅唔易食，寧捧半場和。
（Now 638周日晚9時直播）
貴為皇馬連續3屆歐聯奪冠嘅王牌，C朗今夏突然宣布轉投祖記，梗係想繼征服英超同西甲之後，再喺意甲威威，豈料意甲比佢想像之中難應付，儘管祖記頭3場聯賽贏晒做緊「1哥」，但呢位葡萄牙射手竟然食白果，而且睇到佢愈來愈急躁，正所謂欲速則不達，而佢不嬲認叻要威，啲反效果現晒出嚟。主帥阿里基亦因應C朗加盟去調整陣式，試過用佢打箭頭，又試過移番佢去左路，並起用文迪蘇傑做開路先鋒，不斷變陣係需要時間適應。
薩斯索羅反擊銳利
另一邊廂，薩斯索羅開季頭3場聯賽，取得2勝1和未輸過，包括首輪擊敗國際米蘭，以杜文尼高貝拉迪、侯馬及奇雲保定為首嘅攻擊線，反擊銳利不容小覷。祖記嚟緊周中歐聯要作客華倫西亞，或者會有所保留，何況佢哋都幾慢熱，近6場有5次開半場和，預計薩斯索羅作客會穩陣行先，祖記初段難佔甜頭，半場和值得再追。
