周一凌晨西甲尾場，西維爾主場迎戰基達菲。上季靠穩守突擊搵食嘅基達菲，今季照辦煮碗班波默契更佳，呢場面對殘陣應戰嘅西維爾，絕對有力反客為主，今仗西維爾讓1/1.5球，基達菲下盤係不二之選。
（Now 632周一凌晨2時45分直播）
基達菲上季喺聯賽最終排名第8，對呢支小型班嚟講，成績絕對唔曳，皆因佢哋係除聯賽冠軍巴塞隆拿同馬德里體育會之外，上季聯賽失球數最少嘅隊伍，可見班波雖然冇邊位球員實力特別超班，不過靠整體做好防守，絕對唔容易對付。今季佢哋保留達米安蘇亞雷斯同安頓尼斯等後防主力之餘，再引入中場悍將馬斯莫域，仲有前場佐治摩連拿同安祖路爾斯一高一矮組合愈夾愈熟，表現值得期待，呢場波偷雞成功，絕對唔係天方夜譚。
西維爾殘陣仲要留力歐霸
況且西維爾呢場有多位主力缺陣，繼早前左閘沙治奧艾斯古迪路甩骹要長抖之外，中場新兵干拿倫斯同後衞伊巴謙阿馬度都做埋十字軍，本身西維爾今夏有中場核心尼桑斯離隊，實力已經打折扣，呢場仲要撞正洛基美沙坐波監冇份踢，搞到主帥柏保路馬捷恩隨時陷入中場無人可用嘅慘況，加上佢哋嚟緊周中仲要應付歐霸，今戰隨時勒住踢，讓1/1.5球真係離晒地，博基達菲下盤好過。
