周日晚英超激戰，新升班嘅狼隊主場鬥般尼。今季強勢回歸英超嘅狼隊，靠住一班高質葡萄牙兵，表現可圈可點，呢場對住開咧未贏過波嘅般尼，有力靠主場之利全取3分，主勝咪走雞。
（Now 621周日晚上8時30分直播）
近年獲中資支持，兼有超級經理人佐治文迪斯加盟嘅狼隊，引入多位實力超班嘅葡萄牙兵，今季最矚目嘅，肯定係門神魯爾柏迪斯奧同中場核心摩天奴，兩位都係葡萄牙喺2016年歐國盃奪標功臣，實力同經驗自然毋庸置疑，不過表現最令球迷滿意嘅，反而係一班小將，其中包括魯賓尼維斯同艾達馬查奧爾，尤其後者雖然今季3次出場都係後備上陣，不過靠住出色個人能力，經常搞到對手後衞頭都大，呢場佢哋隨時再有出色演出。
尤其上季靠出色防守揾食嘅般尼，今季好似變咗隊波咁，聯賽開咧至今未贏過波之餘，近3場已經失咗9球，防線千瘡百孔，點招架到狼隊一班進攻好手呢？最弊球隊攻力不嬲都唔算出色，陷入落後情況下好難有還擊之力，呢場形勢不容樂觀，寧願捧番主勝好過。
