關於今屆歐聯嘅香港轉播權花落誰家，近日終於塵埃落定，兩台獲播皆大歡喜，其中Now連埋歐聯及英超在內，包攬咗6大頂級賽事，絕對係球迷之福。我亦鐵定以part time形式，喺10月開始為Fox Sports講波，而Fox Sports嘅前身係我舊東家ESPN，今次重投娘家效力確係高興，將會為大家評述德甲及亞洲聯賽冠軍盃等重要賽事。
般尼韋斯咸積弱難發圍
近日熱話，首推颱風山竹襲港，好多本地賽事都宣布取消，既然如此，球迷們不妨安坐家中，去觀賞外國波好過。事實上，今晚有2場時間唔錯嘅英超上演，首先係頭場狼隊主場對般尼，上季異軍突起嘅般尼，由於季初要兼顧歐霸外，喺冇乜增兵之下嚴重走樣，就算依家已經喺歐洲賽出局，但呢類中型班打道氣，道氣洩咗就好弊。尾場愛華頓主場對韋斯咸，「錘仔幫」頭4場聯賽輸晒，士氣唔慌好，因此我相信近況曳爆嘅般尼同韋斯咸，搶分只得兩個機會，就係渺茫同冇機會。
