新帥領航攻擊手大解放
周四凌晨歐聯分組賽大戰，G組「銀河艦隊」皇家馬德里將於主場同羅馬重演前季16強戲碼。皇馬今季雖然冇咗C朗，不過喺新帥洛佩特吉帶領下，反而造就其餘攻擊手上位，今場面對開咧表現麻麻嘅羅馬，絕對有力搶食頭胡，讓球盤皇馬讓一球／球半，臻贏特一於推介上盤。
（Now 644、有線601及661台周四凌晨3時直播）
連續3屆歐聯都捧盃嘅皇馬，雖然今夏經歷改朝換代，送別功勳主帥施丹同葡萄牙球星C朗，尤其後者作為皇馬多年嘅王牌，呢次離隊難免令球迷擔心球隊成績，會唔會因此受到影響。不過新帥洛佩特吉同佢嘅新「銀河戰艦」就證明冇咗C朗，隊波戰力毫無影響，甚至仲有所提高。皆因以往一班活喺葡萄牙球星陰影下嘅幾位隊友，包括賓施馬同加里夫巴利終於見到出頭日，近排入波助攻停不了，其中「大聖爺」加里夫巴利踢4場聯賽入咗3球，好得戚咁話：「好似C朗呢種巨星離隊之後，皇馬表現一定會有唔同，但改變係我哋踢得輕鬆咗，比以往更加似一支球隊、大家都以團隊為重，而唔係以個別球員作為一面倒重心。」
羅馬防線甩漏多
有「大聖爺」加賓施馬撐住，再加埋影皇馬大合照時取代C朗企正中間位、傍實領隊洛佩特吉嘅中場核心莫迪歷等球員，佢哋都為皇馬攞足幾屆歐聯錦標，任何大場面都見慣見熟，加上西班牙「新金童」馬高阿辛斯奧表現日漸成熟，啱啱國際賽期代表「狂牛軍團」轟入靚波，有呢幾位攻擊手壓陣，皇馬火力都幾得人驚。
相反，羅馬開咧戰績就差好多，4輪聯賽踢完僅得1勝2和1負，表現咁飄忽，相信同球隊今夏大換血有好有關係，其中門神艾利臣比加及中場悍將尼恩高蘭都已經離隊，嚴重影響中後場默契，羅馬近3仗失咗7球，足證防守漏洞甚為嚴重，就算補充咗新兵尼桑斯「執漏」，都未必可似喺短時間內同班新隊友夾得熟，呢條防線唔值得信賴。今場羅馬作客想保住1分真係冇咁易，寧願捧番皇馬上盤好過。
