造訪紅魔以葡制葡
今晚英超焦點大戰，曼聯主場迎擊升班球隊狼隊，「紅魔鬼」周中歐聯作客炒年青人3蛋，錄得3連勝睇落順風順水，弊在踢落其實仲係隊形欠奉，遇上較具實力嘅球隊隨時現形，加上啱啱踢完歐聯耗力唔少，今仗主場僅讓半一，相信係曼聯英超史上對升班球隊讓得最少嘅一次，可見莊家同樣唔睇好，樂比信狼隊可「以葡制葡」，撐2.14倍下盤！
（Now 621周六晚10時直播）
馬迪「福仔」停賽影響大
曼聯季初出閘脫腳，創下26年來最差成績，喺連敗畀白禮頓同埋熱刺後，近日看似回勇，聯賽加埋歐聯連贏3場，不過過程絕非一面倒。曼聯最大問題依然係進攻欠套路，淨係靠球員嘅個人質素單打獨鬥，又或者冇效率咁高空轟炸，面對密集防守時，根本難以撕破對手防線，今仗更有中場尼曼查馬迪及前鋒拉舒福特停賽，前者缺陣令「紅魔」掃蕩能力大打折扣，「福仔」唔出得亦令前線籌碼減少。
作客嘅狼隊絕非一般升班球隊咁簡單，自中國財團復星兩年前成功收購後，球隊日漸強大，喺超級經理人佐治文迪斯穿針引線下，吸引唔少優質球員加盟，當中葡萄牙及葡超系球員如魯爾占美尼斯、摩天奴及魯賓尼維斯等人都極具質素。狼隊自季初輸畀李斯特城後，愈踢愈入局各項賽事獲3勝1和，當中試過1比1打和上屆聯賽王者曼城，真材實料絕非僥倖，今場實行「以葡制葡」，克制曼聯領隊莫連奴。
英超「最後生」 狼隊活力搭夠
狼隊另一優勢係年輕有活力，唔少主力都係20歲出頭，若計平均年齡更屬全英超最低，只得25.3歲，後生仔可能經驗較輸蝕，但近仗所見不斷傳球走位嘅踢法向來係「寸王」最怕應付，愈踢愈順下今場隨時帶來驚喜。
