英超全勝之師利物浦今晚主場恭候修咸頓。「紅軍」剛於周中歐聯以3比2絕殺勁旅巴黎聖日耳門，士氣爆燈，加上下輪聯賽將作客史丹福橋硬撼車路士，今場自然希望盡早擊敗「聖人」，保持強勢迎接榜首大戰。利物浦近8場皆能由頭贏到尾，主W賠率得1.11倍冇肉食，不妨改捧1.5倍半全場「主主」。
（Now 622周六晚10時直播）
利物浦季初銳不可擋，上場聯賽作客Big 6之一嘅熱刺，喺全場控制戰局下贏2比1，周中歐聯更早喺上半場已領先億萬大軍聖日耳門，過程雖驚險，但最終仍以3比2絕殺對手，士氣同狀態都弗到漏。利物浦未來1周將於英聯盃及英超兩鬥車路士，之後歐聯又要作客拿玻里，跟手聯賽再撼曼城，當中兩場聯賽更可以講係今季爭標關鍵戰，相比之下今晚對手修咸頓易食得多，「紅軍」更加不容有失，務求保住強勢迎接連場大戰。
高壓逼搶利早段入波
修咸頓上場聯賽主場對白禮頓領先2球下，最終都被逼和2比2，開季5戰僅1勝，士氣大受打擊，同時亦反映「聖人」防線不夠集中嘅問題。利物浦喺高普帶領下，一開波就高壓逼搶，所以經常能喺早段打亂對手陣腳率先入波，基於佢哋今季後防表現大躍進，領先後就專心打反擊，連同季前熱身賽、聯賽及歐聯，「紅軍」近8場全開「半贏全贏」，既然主Ｗ冇肉食，讓兩球又有贏波輸盤風險，熱捧半全場「主主」仲穩陣。
