射手爆發勒唔住
周日凌晨西甲大戰，皇家馬德里將會喺主場迎戰愛斯賓奴。皇馬今季開局強勢，尤其主場優勢明顯，多得一班前場攻擊手夠爭氣，今場面對實力欠奉嘅愛斯賓奴，「銀河艦隊」佔主場之利隨時一開波就搶攻，半場主勝捧得過。
（Now 632周日凌晨2時45分直播）
多年嚟西甲冠軍嘅主要競爭者，不外乎皇馬同巴塞隆拿雙雄，不過上季皇馬聯賽開局頻頻失分，尤其主場多次意外畀對手偷到雞，令聯賽爭霸早早失去懸念。今季皇馬痛定思痛，開局搶得不俗成績，計埋啱啱歐聯3比0橫掃羅馬，近3仗主場大獲全勝，總共狂轟9球。
主場對賽例速戰速決
皇馬成績標青絕對要多得一班進攻好手，其中賓施馬同加里夫巴利聯賽至今合共炮製7球，齊齊高踞射手榜前列位置，加上前鋒馬里安奴戴亞斯回歸球隊之後，上仗首次上陣就於歐聯有斬獲，可見球隊入球能力絕對唔講得笑。
愛斯賓奴今季表現明顯主強客弱，近2仗作客連實力一般嘅切爾達同艾拉維斯都贏唔到，況且佢哋去親皇馬主場挑機都冇好下場，近4次作客同皇馬交手輸晒之餘，全部半場就落後對手，半場主勝追得過。
