拜仁強勢追擊史浩克
今晚德甲直播壓軸戲，史浩克04主場迎戰班霸拜仁慕尼黑，呢場原本係德甲傳統大戰，但今季戰績各走極端，拜仁開咧所向披靡未逢敵手，3連勝排德甲榜首，相反史浩克3戰全敗仍然處於掙扎期，少帥泰迪斯高面臨被炒壓力，依家正正係佢哋最唔想遇到拜仁嘅時候，今場拜仁作客讓一球、球半都唔算多，黑柴撐上盤。
（on.cc東網周日凌晨零時30分直播）
史浩克中後場有排執
泰迪斯高上季喺一片質疑聲中接手史浩克教鞭，球隊無論表現同成績都超出高層同球迷期望，上季仲取得等咗3年嘅歐聯分組賽資格，只可惜好景不常，季前放走咗兩大中場領軍者哥列斯卡同麥斯美亞，環顧陣內仲未有人可以頂替佢哋嘅位置，令史浩克開季後中場串連陷於癱瘓，組織全無章法，不停斷纜亦令防線所受壓力大增，拿斯達錫同新中堅沙利夫辛尼不斷犯規，搞到防線經常輸罰球，老將拿杜更力不從心，喺啱啱嘅歐聯仲連送兩個12碼，遇上前線猛將如雲嘅拜仁，咁踢法同送死冇乜分別。
拜仁開季愈踢愈順，除咗聯賽未受考驗外，啱啱歐聯亦作客輕取賓菲加，連加盟後發霉咗兩季嘅小將連拿度辛捷士都爆發，證明新帥尼高高華用小將有一手，加上多名傷將康復，今晚大將洛賓、占士洛迪古斯同查維馬天尼斯都要喺後備席上等機會。拜仁近10場德甲有9場入波最少3個，相反史浩克德甲3連敗之餘每仗都失兩球，今晚拜仁要贏多過一粒問題唔大。
