猛將當道有埋地利
周六凌晨歐洲各大聯賽好戲連場，阿King度咗條過關好路同大家分享。其中意甲薩斯索羅將會主場迎戰安玻里，今季開咧演出令人眼前一亮嘅薩斯索羅，近年對親安玻里都有好表現，呢場佔盡主場之利，主勝冇難度。
(Now 638周六凌晨2時30分直播)
上季聯賽最終排名第11嘅薩斯索羅，今季除咗引入奇雲保定同文路爾盧卡迪利等實力猛將之外，仲搵嚟新帥迪施比執教，呢位年僅39歲嘅少帥，上季雖然未能帶領賓尼雲圖成功護級，不過領軍風格令人印象深刻，今季佢有班實力更強嘅球隊喺手，有更大發揮空間，即刻交出不俗成績，繼早前主場爆冷擊敗國際米蘭之後，再以5比3大勝熱拿亞，計埋早前意盃賽事，近3仗主場大獲全勝，走勢好勁。
安玻里用「90後」打天下
反觀安玻里方面，呢支升班球隊開鑼戰擊敗卡利亞里後，即時打回原形，近3仗竟錄得1和2負。其實安玻里即使升咗上嚟甲組，都只係沿用佢哋上季意乙嘅「青春班」打天下，陣中以「90後」為骨幹，最癲嘅係連「00後」中場、年僅18歲嘅咸特查奧爾都經常落場，論經驗輸晒，加上近3次作客面對薩斯索羅全敗，今場咪拗頸，薩斯索羅主勝有1.85倍勁抵玩。
同時間開波嘅，仲有德甲史特加主場鬥杜塞爾多夫，不嬲喺自己地頭踢得保守嘅史特加，係上季聯賽主場失球數最少嘅球隊，呢場面對新升班嘅杜塞爾多夫，唔會畀機會對方攻擊手發圍，2.5球中位數細盤冇走雞。
（Now 671周六凌晨2時30分直播）
最後再搭多場法甲摩納哥主場迎戰尼姆，法甲新軍尼姆戰意頑強，今季對親強隊表現都有辦有眼，況且摩納哥歐聯啱啱輸波，士氣大挫，呢場就算坐鎮主場都信唔過，揀讓球客勝好過。
（Now 639周六凌晨2時45分直播）
