今晚歐霸盃分組賽開打，E組勁旅阿仙奴將於主場迎戰烏克蘭球隊禾斯克拉。阿仙奴今場好大機會起用門將賓特尼奴、防中盧卡斯托拉拿等新兵，難得有機會擔正一定搏甩髀，喺主帥艾美利面前爭取表現，面對弱旅禾斯克拉唔會留手，讓球主客和就算要讓2球都照捧2倍讓球主勝。
（Now 643、有線662及602台周五凌晨3時直播）
阿仙奴上屆喺老帥雲格帶領下，跌跌碰碰都殺入歐霸盃4強，今屆改由艾美利掌舵梗係唔想失威；賽前盛傳新加盟嘅賓特尼奴、列治史迪拿及盧卡斯托拉拿今場會打正選。查實正選門神施治嘅腳下功夫麻麻，唔多適應艾帥主張從門將開始策動進攻嘅打法，今仗正好畀賓特尼奴證明自己嘅機會，而防中盧卡斯托拉拿具備大範圍跑動及搶截嘅功能，之前聯賽幾次後備入替都交足貨，為進一步爭取主力位置，今場鬥心唔使懷疑，而淪為後備嘅前鋒韋碧克亦要打爭氣波，佢哋隨時比常規主力球員更搶韁。
踢出信心乘勝追擊
烏克蘭「5哥」禾斯克拉名不經傳，近7場只得4勝3負表現一般，前幾屆踢歐霸盃都早早喺外圍賽出局，唔好睇得咁高。雖然阿仙奴今季開咧成績麻麻，頭2場聯賽輸晒，但要留意對手係曼城同車路士，之後3場即全勝，明顯走出谷底。依家信心返晒嚟，加上一班新兵及副選急於爭取表現，今場遇弱正係騷哥利嘅好時機，讓球主客和讓到2球都冇有怕，直取讓球主勝。
