今晚歐聯繼續好戲連場，其中H組風頭躉曼聯要作客瑞士「1哥」年青人。雖然紅魔連贏2場止住頹勢，但佢哋近年喺歐聯作客戰績麻麻，主帥莫連奴生性保守，造訪近況唔曳嘅年青人唔係贏梗，仲要讓到半一咁多，寧捧有地利嘅年青人下盤。
（有線604及603台周四凌晨3時直播）
曼聯喺香港一向多粉絲，而且喺近2場聯賽連贏般尼及屈福特，總算終止之前2連敗嘅困局。不過有睇開紅魔賽事嘅球迷，都會覺得依家佢哋缺少一些領袖，保羅普巴、阿歷斯山齊士、迪基亞係好波，可惜冇乜邊個好似以前嘅傑斯、堅尼、史高斯等，能夠喺關鍵時刻挺身而出，呢樣正係曼聯近年戰績欠佳嘅主因。
歐聯近7作客僅2勝
當然，主帥莫連奴唔識用麾下球星亦為人詬病，點解喺法國國家隊指揮若定嘅普巴，返回曼聯即判若兩人？除咗莫帥戰術過於保守之外，佢未能因應球員特點人盡其才先係最大問題，成隊波打唔出應有水準，就算球星再多都冇用。雖然今場對住年青人，點秤曼聯實力都係高啲，但紅魔近年喺歐聯客場唔多掂，近7場歐聯作客只係贏得2場咁大把，面對開季後聯賽連盃賽10場未輸過嘅年青人，唔係話贏就贏，況且莫帥每逢客場例必保守，隨時和波都收貨，紅魔仲要讓半一，轉捧下盤好過。
