F組賽事，英超盟主曼城主場迎戰法甲代表里昂。曼城主場出擊雖係信心保證，不過原來自從哥迪奧拿執教曼城之後，佢哋喺主場出戰歐聯只係試過1次淨勝對手3球或以上，今場要讓兩球唔值博，波童建議轉捧1.5球半場大。
（Now 643、有線662及602台周四凌晨3時直播）
曼城上場聯賽主場雖然大勝富咸3比0，不過領隊哥迪奧拿賽後大發雷霆，直斥球員喺比賽初段浪費入波機會，而且好多傳送、控波都做唔好，未能達到佢嘅要求，一眾球星畀人咁鬧完，相信今場會醒醒定定，唔會再喺初段夢遊球場。
自從哥迪奧拿喺16/17球季上任以來，曼城對上2屆歐聯分組賽都能順利出線，其中上屆3仗主場分組賽全勝，不過有2次都係僅勝1球。再睇遠啲，哥迪奧拿帶曼城踢咗10仗主場比賽，只有1次能夠淨勝對手3球或以上，其餘6次贏波有3次贏1球、3次贏2球，其餘3場1和2負，甚少大勝對手。更何況，上述10場比賽曼城只有4次保持清白之身，其餘6場加埋失咗10球，防線絕非牢不可破，今場曼城讓兩球，即要淨勝3球先贏盤的確唔太抵玩。
里昂冇包袱鬥攻
里昂相隔一季再戰歐聯，上次佢哋喺分組賽屈居祖雲達斯及西維爾之後轉戰歐霸，結果4強階段被阿積士淘汰，上屆歐霸佢哋16強出局，累積唔少歐戰經驗。今季佢哋雖然放走咗箭頭馬里安奴戴亞斯，不過由些路迪羅致踢法一樣具侵略性嘅法國小將穆沙迪比利，配合上季加埋入咗63球嘅進攻鐵三角費基亞、迪比及貝特蘭查奧爾，鋒力唔可以睇小，今場冇心理包袱隨時同曼城鬥攻。
