今晚深夜意甲開快車，開季5戰全勝嘅「1哥」祖雲達斯主場鬥博洛尼亞。祖記王牌C朗摸熟意甲風格後，腳風愈嚟愈順，近2仗就轟入3粒，今場面對實力一般嘅博洛尼亞，「老婦人」擸3分已經係基本要求，分分鐘又上演「大屠殺」，讓球盤讓2球照捧祖雲達斯1.85倍上盤！
（Now 638周四凌晨3時直播）
C朗喺日前FIFA頒獎禮度輸咗畀前皇家馬德里隊友莫迪歷，呢位葡萄牙球星不嬲好勝心強，連頒獎典禮都唔畀面出席，就知佢對結果幾咁失望。不過C朗出晒名唔輕易服輸，繼前一輪射入加盟祖記嘅首個意甲入波，仲喺該仗梅開二度後，上仗聯賽對住費辛隆尼再有斬獲，幫「老婦人」全取3分，聯賽開咧至今保持全勝姿態，睇嚟C朗已經適應意甲嘅比賽節奏，加上有極速上位嘅意大利攻擊好手貝拿迪斯治做輸送，配合季初腳風甚順嘅文迪蘇傑等人，祖雲達斯火力夠晒驚人。
博洛尼亞大將停賽
博洛尼亞實力欠奉，開咧表現亦「油麻地」，近兩仗作客未贏過之餘1球都入唔到，可見反擊能力令人堪憂，今仗更有中場大將艾歷普爾加坐波監，作客超晒班嘅祖雲達斯，只能祈求減少失波數字，1.85倍上盤絕對係不二之選。
