周中各地都加開聯賽同盃賽快車，阿King睇中3場盃賽，先講場蘇格蘭聯賽盃8強賽事，由格拉斯哥流浪主場鬥艾爾。格流主帥謝拉特經過季初一輪揣摸之後，已經熟習球隊及聯賽運作，由起初入波唔多，到依家已經可以重拾班霸本色，最近3場總入球都達4球或以上，今場大細中位數調高至3/3.5球，入球大同樣萬勿錯過。
季初格拉斯哥流浪頻頻開細，令到一眾大盤客損手，好彩經過磨合之後，球隊重上正軌，如果只計聯賽，佢哋6場入15球，係蘇超入波最多球隊，即使要分心踢歐霸同盃賽，7場其餘賽事6場有波入，唔使擔心球隊入球能力。格流喺9月頭作客僅以0比1輸畀些路迪，證明已有同對方爭霸嘅能力，之後格流嘅3場賽事合共入咗11球，大炒登地及聖莊士東可以作為今仗參考。兩軍均屬蘇超下游球隊，同今仗對手蘇冠仔艾爾實力差唔多，格拉斯哥流浪入波唔成問題，但艾爾亦係爛砌之流，對唔同對手一樣照攻，不如捧入球大仲化算。
串洛辛堡大青年體育會細
之後睇場挪威盃8強洛辛堡對華拉倫加，兩支國內死對頭每次碰頭都踢到飛沙劈石，最近6次交手全部開大，洛辛堡啱啱聯賽落後薩普斯堡之下反勝3比1，狀態士氣都高漲。華拉倫加兩周前聯賽主場遇洛辛堡，入波先最終被對方補時絕殺輸2比3，谷埋一肚氣，今場一定要復仇，唔會留手，今場又係入球騷。
最後講埋場有電視直播嘅南美球會盃16強首回合，哥倫比亞代表青年體育會對阿根廷高隆，高隆踢南球盃向來保守，之前兩圈對FC薩莫拿同聖保羅，主客共4場全部開細，今場睇嚟入波唔會多啦！
（有線602及662台周四早上8時15分直播）
