魔鬼賽程留力英超再砌
周四凌晨英聯盃第3圈重頭戲，利物浦將會主場同車路士上演「紅藍大戰」。紅軍即將進入魔鬼賽程，喺英聯盃早階段就算面對強敵都難以最強陣應戰，另外車仔聯賽失分後，都希望喺下仗全力拉近同紅軍喺積分榜上嘅距離，兩軍齊齊留力，入波唔慌會多，寧願捧細盤好過。
利物浦堪稱係今屆英超開局最強勢嘅球隊，計埋歐聯首戰擊敗巴黎聖日耳門，紅軍各項賽事已經豪取7連勝，不過真正挑戰陸續有嚟，其中喺一周內就要2次硬撼死敵車路士，連場惡戰對紅軍球員體能肯定會造成巨大壓力，尤其最令利迷擔心嘅，肯定係隊中球星穆罕默德沙拿。呢位埃及攻擊手自上季歐聯膊頭重傷，抖咗冇耐又要幫埃及踢世盃，聯賽開咧之後佢雖然屢有斬獲，不過明顯未回復到最佳狀態，為免令包括佢在內嘅一班主力球員體能負荷過重，領隊高普呢場好大機會出輪換大法，派蘇蘭基同史杜列治等一班副選應戰。
另一邊廂，啱啱喺聯賽甩轆失分嘅車路士，為拉近同英超1哥利物浦嘅距離，肯定全力備戰嚟緊同利物浦嘅榜首大戰，呢場都英聯盃料都會留力，況且車仔近6次作客同紅軍交手，5次都開2球或以下，呢場2.5球嘅細盤值得再追。
韋斯咸弗番勢炒乙組仔
同時間開波嘅，仲有韋斯咸主場迎戰英乙球隊馬爾斯菲。錘仔幫繼早期聯賽取得首勝之後，上仗再逼和同市勁敵車路士，搞到對手連勝紀錄斷纜，狀態已經弗番。呢場面對喺英乙都包尾嘅馬爾斯菲，幾位新兵盧卡斯佩雷斯同耶莫蘭高為爭上位，肯定唔會放軟手腳，韋斯咸想喺主場大破對手輕鬆晉級冇難度，讓兩球照揀讓球主勝。
