緬恩斯狼堡鋪鋪講和
今晚尾場德甲，暫排聯賽第7位嘅緬恩斯，主場出戰第5位嘅「狼堡」禾夫斯堡，兩軍近季可以話係沙煲兄弟齊上齊落，上季雙雙艱難護級成功，今季開季又齊齊喺冇人睇好下踢出令人意外好成績，目前同樣4戰得7分，又齊齊喺上輪被打破今季不敗身。佢哋唔只遭遇相似，連陣式亦同樣用4321，更巧合嘅係兩軍近兩年半來5次碰頭，結果全部和波收場，今晚賽前評估亦同樣係五五波，建議再追有3.15倍分頭嘅和局。
計牌面，緬恩斯原本應該再睇低啲，佢哋今夏一如以往，流失多名重心球員，防線領袖艾度迪亞路重金加盟多蒙特，前線食胡人物武藤嘉紀轉投紐卡素，中場掃蕩嘅蘇奧沙達亦畀史浩克04挖走，只補入一批冇乜名氣嘅年輕球員，但佢哋季初嘅表現竟然比上季好，季初兩勝1和後，上仗作客利華古遜雖然1球僅負，但計表現其實輸得有啲唔抵，而佢哋呢場嘅11個正選球員，平均年齡只有22.8歲，更加創下咗球會喺德甲嘅最年輕正選紀錄添！
小鬼當家數據亮麗
至於禾夫斯堡上季靠附加賽險勝至唔使降班，今季引入嘅兩位前鋒丹尼爾真錫克同韋格賀斯亦唔算大牌球星，但憑住每人走多一步，季初成績遠比預期好。緬恩斯同禾夫斯堡陣中球員大多數年紀輕名氣細，但勝在實而不華，仲有亮麗數據支持，緬恩斯嘅21歲左閘艾朗馬田，今季交出23次傳中球冠絕德甲，而禾堡嘅防守中場伊拿斯奧甘馬曹，就以68次攔截暫時做咗德甲截擊王。既然兩軍瓣瓣都咁相似咁接近，今晚碰頭好可能繼續講和。
