今晚西甲快車大戰，西維爾主場硬撼皇馬。西維爾每逢自己地頭對強隊零舍起勁，射手賓耶達腳風轉順，拍住安達施華打反擊堅煞食；「銀河艦隊」上場收起加里夫巴利等主力留力呢場，加上近年對碰例必大手交易，中位數3.5球嘅2.1倍大盤有分頭玩得過。
（Now 632周四凌晨4時直播）
西維爾今季開局麻麻，但上仗作客利雲特重拾霸氣，大炒6比2令人喜出望外，除咗新加盟嘅葡萄牙新星安達施華繼續有貨交之外，射手賓耶達更連中三元，重拾射門鞋，配合有入波兼造出3次助攻嘅沙拉比亞，打出流暢兼具威脅嘅快速反擊。而且西維爾每逢主場遇強特別搏命，上季就喺自己地頭贏過皇馬3比2，仲打和過巴塞及喺歐聯砌低曼聯，主場威力不容小覷。
近11次交鋒炮製53球
皇馬上仗小勝愛斯賓奴1粒，開季5場聯賽取得4勝1和，而且上仗特登收起主力加里夫巴利、卻奧斯及馬些路等人，好明顯係主帥洛佩特吉深明今仗惡踢，寧願畀佢哋養精蓄銳，今晚先傾力出擊，連同新鮮出爐嘅世界足球先生莫迪歷，攻力唔講得笑。翻查紀錄，兩軍近11次聯賽交手，合共炮製53個入波堅嚇親，其中8場開4球或以上，鬥攻格局捧3.5球大盤。
