巴伐利亞打吡愈贏愈易
周中德甲開快車，今晚先行上演4仗，焦點係拜仁慕尼黑主場對奧格斯堡嘅巴伐利亞打吡戰；拜仁開季後所向披靡，加上現時正值慕尼黑啤酒節，新帥尼高高華同一眾球員都準備好盛裝參與慶祝活動，當然想用主場漂亮勝仗嚟慶祝佳節，加上奧格斯堡近期頭頭碰着黑，「讓球主客和」拜仁讓到兩球都冇有怕，照捧讓球主勝。
（Now 670及FOX+周三凌晨2時30分直播）
慕尼黑啤酒節以前又叫「十月節」，通常喺十月份舉行，為期16日，後來因為天氣問題（十月份係雨季）而提前喺九月展開，今年嘅啤酒節已經喺上周末開始，直至下月7日先至結束，拜仁喺啤酒節揭幕翌日就作客淨勝史浩克04兩球，以好開始慶祝佳節。拜仁職球員習慣穿着傳統民族服裝參加慶祝活動，睇番過去8年，拜仁喺啤酒節期間從未試過喺德甲輸波，今年係新帥尼高高華首度以教練身份參加，當然唔想掃興啦。
事實上，拜仁對奧格斯堡嘅巴伐利亞打吡，近年比數亦愈嚟愈懸殊；拜仁喺過去7次交鋒全勝，去年拜仁主場兩鬥奧格斯堡，分別大勝6比0同3比0，今年作客亦大炒4個1皮，可以話完全冇得揮。拜仁開季後接近零犯錯，球員為爭取上陣機會十分搶韁，只要有機會落場都全力搏殺盡情數胡，就算奠定咗勝局都唔會留手。
奧格斯堡門將頻派膠
奧格斯堡開季後陣上表現得相當積極，不過近期十分當黑，近兩輪德甲面對緬恩斯同雲達不來梅，佢哋嘅形勢都係佔優一方，可惜兩場波都因為門將基爾化嘅嚴重犯錯，搞到1分都攞唔到，認真洩氣。賽後奧格斯堡經過會議，仲打算繼續畀機會呢位門將重拾信心，不過今晚作客慕尼黑遇上實力更強大嘅拜仁，基爾化要走出陰霾將會更加困難，預期拜仁可以繼續大勝。
