射手復出齊晒腳
今日雖然賽事唔多，但正所謂貴精不貴多，阿King一樣搵到好嘢，其中對俄超獨腳戲森馬拉主場對卡斯洛達最有心水。卡斯洛達開季表現平穩，今場仲有前鋒阿里刑滿復出，陣容更加齊整，造訪狀態欠佳嘅森馬拉，有力反客為主，讓平半照捧上盤。
（周一晚11時30分開賽）
近年一直穩站俄超中上游嘅卡斯洛達，今季持續保持穩定水準，連埋上周中歐霸贏阿卡沙在內，近7場取得5勝1和僅1敗，弗到漏油，而且前鋒阿里亦坐完波監，今場可以復出，夥拍巴西射手雲達臣蘇沙，鋒力有保證。相反，森馬拉位列聯賽榜下游，近4場聯賽輸咗3場，仲要入得1粒咁大把，真係攻守都唔掂，加上迪基耶夫及荷西勒臣因傷上陣成疑，難擋客軍來襲，卡斯洛達讓平半都冇有怕，上盤有計。
葡超大戰士砵亭受讓筍
至於葡超大戰，布拉加主場硬撼士砵亭，兩軍都排前列一樣咁弗，不過布拉加傷兵滿營，好似保連奴費南迪斯、薩達斯、魯爾米高等多名主力倦勤，影響甚大，而士砵亭前鋒拉菲爾戴亞斯及中場波基斯費南迪斯頻有士哥，將射手巴斯杜斯缺陣嘅影響減到最低，回巢嘅翼鋒拿尼亦告復甦，況且近6次作客鬥布拉加僅1敗，受讓必捧讓球客勝。
最後係場巴甲，華斯高主場對巴希亞，華斯高近5場只得1和4負，淪為護級分子，曳到冇朋友，撞正近4場僅1敗嘅巴希亞，冇本錢讓波，讓球客勝有計。
