艾美利領軍漸入佳境
英超周末壓軸戰，阿仙奴主場鬥愛華頓。新帥艾美利領軍嘅兵工廠，近期進攻愈踢愈順，尤其隊中幾位前鋒都有貨交，呢場面對走勢下滑嘅「拖肥糖」，佔主場之利嘅阿仙奴想搶分話咁容易，只讓愛華頓一球，上盤自然捧得過。
（Now 621周日晚11時直播）
西班牙主帥艾美利今季由雲格手中，接過新廠長頭銜，挑戰絕對唔細，唯一一個需要解決嘅問題，就係前場進攻問題。愛懷舊嘅廠迷，相信都唔會唔記得當年勇奪英超冠軍嘅不敗之師，其中最為人樂道嘅，肯定班波行雲流水嘅進攻，如今呢批槍手球員嘅個人能力，當然冇得同當年經典陣容比較，不過新帥艾美利早前就開到聲，話對以拿卡錫迪同奧巴美揚為首嘅前線組合充滿信心，而兩人喺新廠長悉心調教之下，默契同表現都漸入佳境，射門觸覺都返晒嚟，加上奧斯爾同韋碧克近期都齊齊有貨交，幫助球隊取得主場2連勝，睇嚟艾美利係有啲計。
愛華頓換帥未洗頹風
相反英超新「土豪」愛華頓，雖然今夏繼續大手筆增兵，仲揾埋新帥馬高施華接手，不過似乎未擺脫上季頹勢，聯賽頻頻失分，皆因班波明顯未建立有效戰術。尤其中場冇人箍波，控球能力嚴重缺乏，上仗勉強用「工兵」伊祖沙古爾同舒尼達連喺中場擔起組織重責，結果鑄成大錯，連累球隊大敗畀實力麻麻嘅韋斯咸，可見中後場唔算穩陣。就算呢場有巴西前鋒李察利臣坐完波監復出，愛華頓都難向控球能力超班，兼狀態大勇嘅阿仙奴搶分，寧願捧番上盤好過。
