美斯剃鬚明志打爆基
周一凌晨西甲大戰，巴塞隆拿主場同基羅納上演加泰隆尼亞區打吡。「地上最強」新季主場繼續強勢，尤其攻擊組合喺美斯帶領下火力驚人，為鞏固地區老大哥地位，今場面對同區死敵肯定唔會留手，中位數3.5球大盤冇走雞。
（Now 632周一凌晨2時45分直播）
美斯鬥C朗嘅西甲話題對決成為絕唱之後，好多人質疑美斯會否因為宿敵離開，從此失去求勝心，不過呢位巴塞核心就用行動證明所有顧慮都係多餘。啱啱剃走滿臉濃密鬍鬚、感覺清爽不少嘅美斯今季首次被委以巴塞1號隊長嘅重任，責任大咗，反而令佢更有鬥志，近3仗主場呢位阿根廷球王狂轟7球，帶領球隊大獲全勝之餘，其中2仗都開4球或以上，再配合蘇亞雷斯同奧士文尼迪比利等進攻好拍檔，巴塞攻力絕對有保證。
兩守將缺陣 基羅納濕滯
西甲新軍踏入征戰頂級聯賽第2季，通常困難都會倍增，小型班基羅納都唔例外，好彩佢哋今季成功留住頭號射手史杜安尼，呢位烏拉圭前鋒開咧延續上季超順腳風繼續有貨交。可惜基羅納近年對親西甲雙雄巴塞及皇馬都戰績慘淡，近3仗輸晒之餘，更全開5球或以上，踢法重攻輕守嘅基羅納，今場更有莫積卡同拉馬路兩位主力守將缺陣，令本已危危乎嘅防線更加雪上加霜，隨時畀巴塞血洗，揀中位數3.5球大盤最穩陣。
