歐洲各大聯賽快車冇得停，阿King搵到條心水過關同大家推介。周五淩晨意甲史帕爾主場迎戰薩斯索羅，薩斯索羅踢法有前冇後，聯賽入得又失得，面對主場強勢嘅史帕爾鬥攻冇留手，2.1倍大盤咪走雞。
（Now 638周五淩晨1時直播）
由意大利少帥迪施比執教嘅薩斯索羅，今季大打進攻足球，尤其新兵奇雲保定表現對辦，加盟冇耐就極速上位成為進攻核心，呢位31歲加納老將曾效力ＡＣ米蘭多年，對意甲嘅節奏同風格絕對唔陌生，佢近4仗勁轟3球，腳風甚順，可惜球隊後防唔爭氣，近期場場總有失波，對住主場強勢嘅奇兵史帕爾，隨時合演入球騷，大盤屬信心之選。
基羅納回唔切氣益貝迪斯
較後時間開波嘅西甲直播戲碼，華拉度列主場鬥利雲特。利雲特近排成績跌晒Watt，皆因後防甩漏問題嚴重，上仗就以2比6慘敗畀西維爾，今場對住急欲搶分嘅華拉度列，入波肯定唔會少，同撐中位數2.5球嘅大盤。（Now 633周五淩晨2時直播）最後基羅納主場對貝迪斯，基羅納上仗激和巴塞未必回到氣，對住硬淨嘅貝迪斯難有甜頭，捧讓球客勝。
（Now 632周五淩晨4時直播）
