出於尊重關係，我甚少用「寸王」來形容曼聯主帥莫連奴，不過坊間或傳媒可能比我睇得更通透，覺得佢嘅口才強過領軍能力。畢竟喺運動領域，無論係球員或教練，都會經歷高山低谷，但對於贏盡多項球會級錦標嘅「老江湖」莫帥而言，今勻同保羅普巴嘅將帥不和愈鬧愈大，明顯係犯咗我哋教練行內最大忌─彩要攞盡、輸就盡賴。
須知道教練幾有料都好，亦一定要有好球員執行，有料嘅問題球員邊度都有，點樣去調教正正係教練嘅職責，普巴喺曼聯同法國國家隊嘅表現判若兩人，難道係法國主帥迪甘斯嘅戰術更高明？我相信係佢更得人心。相反，每逢輸波後莫連奴喺記招必講廢話自保，好似當年喺車仔將責任推卸落女軍醫度，呢種乜都賴人唔關自己事嘅性格，仲點會贏得球員信任呢？內部咁多問題，難怪曼聯今季戰績時好時壞喇。
高普賦紅軍爭標特質
相反，其死敵利物浦主帥高普深得人心，令眾將甘心為佢賣命，自佢接手後一步一步進行重建，從殺入聯賽前4到上屆歐聯獲得亞軍，來到今季愈戰愈勇，就算表現一般時都能夠取勝，呢種先係爭標球隊應有特質。
