質素有限焗揀波踢
嚟緊周中歐聯、歐霸有波踢，令今個賽日得1場英超，就係卡迪夫城主場鬥般尼。新升班嘅卡迪夫城過去幾仗連環硬撼Big 6球隊，因此聯賽至今未贏過只屬非戰之罪，查實佢哋主場表現向來唔曳，面對作客疲弱嘅下游球隊般尼，有力搶分，卡迪夫城平手盤捧得過。
（Now 621周日晚11時直播）
相隔5年後重返英超嘅卡迪夫城，一開咧就即刻體驗到頂級聯賽嘅殘酷現實，至今未贏過波之餘，近排仲慘吞3連敗，不過睇真啲，佢哋近3仗嘅對手分別係曼城、車路士同阿仙奴，全部都係攞過英超冠軍嘅頂級勁旅，所以輸波收場都算「合情合理」。查實呢支威爾斯球隊冇大牌球星壓陣，論名氣冰島「鬍鬚佬」艾朗根拿臣已經算係最勁嗰個，仲要因膝傷長抖，所以老謀深算嘅領隊禾諾克就擺明「揀波踢」，一心喺同級球隊身上搶分，開咧曾經逼和哈特斯菲爾德同修咸頓，呢場對住下游分子般尼，肯定出盡力爭勝。
般尼防線衰過「豆腐渣」
加上卡迪夫城本身屬「百年老店」，球迷根基深厚，主場出擊例必坐爆，早前面對阿仙奴來襲，都曾經一度2比2同對手打成平手，證明佢哋喺主場fans助威下，每每都可以睇高一線。
況且，上季「奇兵」般尼，今季開局跌晒watt，除咗歐霸早早遭淘汰外，喺英超都唔算出色，尤其近3仗聯賽作客只取1和2負，包括連續輸畀富咸同狼隊兩支英超新軍，上季引以為傲嘅穩陣防線，家陣就衰過「豆腐渣」，一篤就散，呢場遠征威爾斯恐難有作為，平手盤捧返卡迪夫城好過。
