踢法有前冇後唔會縮
周二凌晨英超獨腳戲，般尼茅夫主場硬撼水晶宮。不嬲打開進攻足球嘅般尼茅夫，今季入得又失得，呢場面對實力差唔多，同樣有強勁攻擊手壓陣嘅水晶宮，擺明鬥攻格局肯定大把入波睇，中位數2.5球大盤唔好錯過。
（Now 632周二凌晨3時直播）
英超出晒名競爭激烈，為咗殺出一條血路，各隊主帥都要冒住隨時畀老細炒魷嘅風險，往往變得「功利」，入到「燕梳球」就即收油死守。相比之下，般尼茅夫主帥艾迪侯域卻屬異數，呢位英格蘭領隊崇尚進攻，一開波就不斷衝擊對手防線直到最後一刻，呢種踢法不但成功取悅到一班球迷，近幾季仲喺英超站穩陣腳，連會方都錫到佢燶，所以上任近6年以嚟地位依然穩如泰山，喺呢個換帥如家常便飯嘅聯賽絕對唔容易。雖然今季般尼茅夫老牌射手迪科爾不敵歲月坐多過踢，但球隊成功留住哥林威爾遜、祖舒亞京治同賴恩費沙等攻擊手，呢班艾帥嘅「子弟兵」夾慣夾熟，進攻效率自然有保證。
相比之下，防守甩漏問題一直都係般尼茅夫嘅致命傷，佢哋近5仗聯賽都有失波，上輪仲作客以0比4不敵攻擊力唔算標青嘅般尼，如果計埋盃賽，般尼茅夫近7仗6次開大盤，其中攻入14球，同時有13粒失波，甚有「有前冇後、打死罷就」風範！
水晶宮有力駁火
至於水晶宮今季走勢相當飄忽，好彩經歷3連敗終於回魂，近2仗都有分落袋，況且球隊擁有韋費特沙夏同安祖斯唐辛等攻擊好手，絕對夠料同般尼茅夫鬥數胡，今仗中位數2.5球嘅入球大相當值博。
