12年嚟歐聯首次免費直播
苦等12年，香港球迷終於可以免費睇歐聯！今晚歐聯F組分組賽，德甲球隊賀芬咸主場挑戰英超班霸曼城，除咗兩大收費電視外，免費頻道奇妙電視77台亦有得播，而且係早場，唔使捱到半夜至開波，球迷睇完至瞓，聽朝都應該夠精神返工喎！基於賀芬咸攻強守弱，曼城非勝不可，今場推介2.04倍嘅中位數3.5球大盤。
（奇妙電視77台、Now 643、有線662及602台周三凌晨零時55分直播）
呢場波唔只球迷等得耐，賀芬咸等得更耐，係佢哋球會史上首次喺主場踢歐聯分組賽，呢班波冇乜大牌球星，最大牌嗰個係喺德國炙手可熱嘅31歲少帥拿高斯文，佢上輪分組賽對薩克達已經刷新咗歐聯分組賽史上最年輕教練紀錄，賀芬咸結果作客以2比2逼和對手，表現並唔失禮。拿高斯文自2016年二月執教賀芬咸以來，表現同成績都遠超預期，佢教埋今季就會轉會RB萊比錫，講明為賀芬咸踢好今屆歐聯係主要目標之一，佢哋上輪分組賽前嘅聯賽已經輸過畀杜塞爾多夫，上周末亦喺主場輸埋畀萊比錫，擺明留力搏今仗。
曼城首輪輸完作客焗攻
曼城上周末主場擊敗白禮頓，以得失球差力壓利物浦升上英超榜首，睇番過程亦明顯為今仗有所保留，事實上唔到領隊哥迪奧拿唔肉緊，佢哋喺分組賽首仗竟然主場輸咗畀法甲里昂，而且哥帥一直被嘲踢唔掂歐聯，自從2011年帶領擁有全盛時期美斯、沙維同恩尼斯達組合嘅夢幻巴塞捧盃後，之後無論帶領巴塞、拜仁同曼城，都係世界最頂尖勁旅，但就一直未能再染指錦標，今仗作客德國焗住搶攻不勝無歸。
曼城牌面當然高出唔只一班，不過賀芬咸少帥拿高斯文向來擅打老虎，佢哋前季對班霸拜仁1勝1和，上季主場亦以兩球贏過拜仁，球隊向來擅攻不擅守，今晚史上首次硬撼曼城必定打醒精神同對手駁火，大盤咪錯過。
