今屆歐聯經常安排2仗頭場，唔使同時間打晒咁多場，今晚頭場之一就係C組嘅巴黎聖日耳門（PSG）主場迎戰塞爾維亞球隊貝爾格萊德紅星。PSG出閘脫腳，為出線不容再失，「麥卡尼」鋒線弗到爆燈，誓炒紅星洩憤，就算讓3球照捧讓球主勝。
（有線662及602台周四凌晨零時55分直播）
首戰失利出氣良機
PSG財力勁人腳醒，近年輕鬆壟斷法甲，因此早已劍指歐聯錦標，可惜總係雷聲大、雨點小，喺今屆首仗又係完場前失守，最終以2比3輸畀利物浦，出師不利。不過PSG今屆改由杜曹執教，自法超盃大勝摩納哥開始，10場正式賽事取得9勝1負，更狂轟33粒，由基利安麥巴比、卡雲尼及尼馬組成嘅「麥卡尼」鋒線，雖然唔係場場出足，但合共入咗17粒，配埋弗番嘅迪馬利亞，火力全開唔係人咁品。
曾經喺1991年拎過歐冠盃（歐聯前身）嘅紅星，早已今非昔比，近年踢歐霸盃都唔多掂，今屆係佢哋26年來，首次獲得歐聯分組賽參賽資格，經驗不足，上仗悶和拿玻里0比0，表現算OK，不過撞正實力強橫嘅巴黎聖日耳門，相信又係另一回事。PSG搶分心切，今仗一定向紅星狂轟猛炸，讓球主客和要讓3球咁辣都冇有怕，直取讓球主勝。
