溫布萊擺陣遇神殺神
今晚歐聯第2輪分組賽B組爆發重頭戲，由熱刺喺倫敦溫布萊球場迎戰巴塞隆拿。熱刺上屆喺溫布萊球場打分組賽特醒，相反巴塞主帥華爾維迪玩輪換玩出禍，搞到連續3場不勝，近7次歐聯造訪倫敦球隊又只係贏得1場，實在讓唔起熱刺，捧讓球主勝。
（Now 643、有線604及603台周四凌晨3時直播）
由於熱刺新主場仍未竣工，需要繼續借用溫布萊出戰歐聯主場比賽，呢支北倫敦球隊上屆3場歐聯分組賽主場，一口氣贏晒多蒙特、皇家馬德里及尼科西亞，每場都攻入3粒，非常醒神，連同近2場聯賽全勝，表現明顯回勇。而且熱刺今屆喺首場分組賽作客國米，臨完場反輸1比2堅唔抵，為保出線機會，今場一定搏甩髀。
華爾維迪玩輪換出事
巴塞今屆歐聯有個好開始，首場分組賽主場以4比0大破燕豪芬，不過之後3場聯賽分別喺基羅納、雷加利斯同畢爾包身上連環失分，僅得2和1負，同主帥華爾維迪不擅輪換有關。華帥喺今季頭幾場都夫添出擊，完全冇畀班副選如艾法美路、蒙尼亞艾哈達迪、尼爾遜施美度太多上陣時間，去到班主力攰爆，華帥先意識到要輪換，但要班冇乜上陣嘅副選一落場即交到貨，實在強人所難。連同中堅烏姆迪迪養傷，碧基又頻頻甩轆，條後防線認真不穩。
翻查巴塞上屆5場歐聯作客只得1勝，以往喺歐聯面對英超球隊又冇乜大優勢，對上7次造訪倫敦球隊更只得1勝3和3負，其中6戰有失波，今仗再訪「凶地」隨時又失分，寧捧受讓嘅熱刺讓球主勝。
