今晚以歐霸盃做主打，其中喺L組嘅英超「3哥」車路士，於主場迎戰弱旅匈牙利球隊維迪奧頓。今場睇落強弱懸殊，不過車仔喺歐霸盃例出副選，弗到爆嘅王牌夏薩特好大機會可以抖一抖，但以失機見稱嘅艾華路莫拉達又未重拾信心，面對死守嘅維迪奧頓，隨時陷於膠着狀態，轉捧大細中位數3.5球嘅入球細仲好。（Now 643、有線662及602台周五凌晨3時直播）
艾華路莫拉達冇態
車仔之前惡戰連場，包括聯賽連英聯盃兩鬥利物浦，主帥沙利亦要王牌夏薩特踢足，呢位比利時隊長連續2場入波弗到震。不過嚟到歐霸盃場合，預計沙利會好似首輪對PAOK咁，畀「夏神」休息；講真車仔今季雖然復甦，但若果冇「夏神」壓陣，要破密集點都係有難度，特別係車仔喺歐霸盃會出多名副選，其中箭頭艾華路莫拉達信心未復，首輪對PAOK難得擔正，點知食白果之餘，仲連續7次射門唔中框，自8月中後都未入過波，狀態曳到冇朋友。雖然維迪奧頓實力麻麻，首輪更被巴迪擊敗，但呢支匈牙利球隊作客車仔只求輸少當贏，一心擺鐵桶陣死守，預計今場唔慌多波入，車仔再叻都只能小勝，一於吼入球細。
