今晚除咗熱刺同曼聯之外，其餘幾支英超強隊要喺星期日先登場，其中有「紅藍大戰」利物浦主場硬撼曼城。利物浦啱啱喺歐聯臨尾香，完場前失守以0比1不敵拿玻里，各項賽事近3場未贏過，不過佢哋喺晏菲路球場出擊特醒，而且紅軍近年亦食住曼城，相信今場可坐和望贏。
乘勇可挫緬恩斯
既然好戲盡在星期日，不如今晚轉睇德甲，因為我唔單止睇波咁簡單，仲要講波添。自從我離開「三色台」後，豹隱3個月終於可再做球賽直播評述，今次喺Fox sports講波，主要係講德甲波。今季德甲同西甲跟往年有啲唔同，暫時未見有球隊獨領風騷，其中近年壟斷德甲嘅拜仁慕尼黑，今季亦出現跌Watt情況，無論對其他德甲球隊或球迷而言，都係一件好事，因為有競爭先有進步，令呢個聯賽更加精彩。今晚德甲有場幾好嘅心水，就係緬恩斯主場對哈化柏林，首都球隊哈化柏林今季開局唔錯，依家位居前列，上場聯賽更擊敗班霸拜仁，氣勢正盛，今仗有力再下一城。
