今晚球愛Live Party同大家一齊睇嘅喺壓軸戲拜仁慕尼黑主場鬥慕遜加柏，拜仁已經連續3場正式賽事贏唔到波，新帥尼高高華備受龐大壓力，今晚主場出擊誓踢翻身仗，遇上近況當銳而且前線着火嘅慕遜加柏肯定好睇過戲，預期雙方會合演入球騷，推介1.7倍嘅中位數3.5球大盤。
（on.cc東網周日凌晨零時30分直播）
拜仁新帥尼高高華近期諸事不順，喺德甲先畀奧格斯堡臨完場前逼和，跟住作客輸埋畀哈化柏林，然後歐聯主場打阿積士亦只能失望咁踢成1比1，連仗失利後仲爆出更衣室有唔和諧聲音，中場占士洛迪古斯埋怨有球員無論踢得幾差都有得擔正，好明顯針對國寶級「金童」湯馬士梅拿，仲話如果情況冇改善，唔排除會離隊添！
慕遜加柏新箭頭有料到
尼高高華近期亦以行動回應，搵咗湯馬士梅拿詳談照肺，今仗占士洛迪古斯同歷卡斯蘇尼呢啲有怨言嘅球員都會擔正，今晚主場出擊值得畀多次機會。不過拜仁近期戰績下滑，主要原因係中場防守能力薄弱，查維馬天尼斯明顯缺態，堤亞高艾簡達拿又唔夠硬淨，根本唔係防中材料，搞到好易畀人打反擊，面對以反擊聞名嘅慕遜加柏，想保持清白之身絕唔容易。
慕遜加柏今季既進步又穩定，目前已經殺上聯賽榜前4名，最難得嘅係前線愈戰愈勇，身價達到2,300萬歐元嘅貴價新前鋒柏利亞好快已經證明物有所值，除咗6場聯賽入4球之外，佢嘅走動同互傳亦激活咗全隊鋒線，難怪被評為德甲開季至今表現最搶鏡前鋒，慕遜加柏今季德甲場場有波入，近4輪共轟入9球，面對欠缺中場屏障嘅拜仁防線有力偷雞，大盤最穩。
