除咗壓軸戲睇拜仁之外，德甲早場東網一樣有得睇，當弗嘅哈化柏林作客出戰緬恩斯，呢場波我哋安排咗英語評述，哈化上輪打破拜仁不敗身令士氣大振，呢班波喺注重紀律嘅鐵帥戴達帶領下演出向來穩定，遇上啞火兼傷兵多嘅緬恩斯應可乘勝追擊，平手盤撐客軍哈化。
（on.cc東網周六晚9時30分直播）
哈化上輪擊倒班霸拜仁絕對冇符碌成分，除咗防線一貫緊密外，前線老將伊比斯域同沙洛文卡勞今季一直維持高水準，今季仲爆出23歲克羅地亞新星安德列杜達，呢位小將至今6輪賽事已經入咗5球，包括上輪對拜仁嘅奠定勝局入球，當中兩輪仲當選埋MVP。球隊目前有前有後仲信心爆棚，佢哋一向注重紀律，唔會因為贏咗拜仁就飄飄然，今晚乘勝追擊值得信賴。
緬恩斯傷兵多達7人
緬恩斯今季流失多名主力，整體實力削弱，但季初乘列強未進入狀態，憑每人多走一步，頭3輪取得2勝1和意外佳績，不過近3輪明顯回落，僅得1分之餘仲要零入球，最攞命係陣中累積傷兵多達7人，兵源有限下自然無以為繼，今晚即使有主場之利亦難睇好。
