周日凌晨西甲大戰，艾拉維斯主場挑戰皇家馬德里。皇馬近期表現跌晒Watt，尤其一班前鋒齊齊啞火，把握力欠奉，呢場要作客對住演出夠硬淨嘅艾拉維斯，皇馬想輕鬆過到骨邊有咁易？捧返艾拉維斯下盤好過。
（Now 632周日凌晨零時30分直播）
巴利艾斯高上陣成疑
今夏經歷大換血嘅「銀河艦隊」，近排戰績曳爆，繼早前聯賽0比3遭西維爾大挫之後，上仗作客遠赴俄羅斯踢歐聯，仲意外輸波收場，各項賽事近3仗未贏過之餘，連波都入唔到，前線攻力認真麻麻。其實新帥洛佩特吉季前已經有先見之明，認識皇馬喺C朗離隊之後，鋒線實力欠缺嘅問題，所以先買番馬里安奴戴亞斯，不過呢位多米尼加前鋒嘅級數始終冇得同C朗比較，加上進攻好手加里夫巴利同艾斯高都有傷上陣成疑，如果仲想齋靠明顯冇料到嘅賓斯馬，皇馬呢場可唔可以打破入球荒真係未知之數。
相反上季護級分子艾拉維斯，今季開局痛定思痛生性番，大踢爭氣波，尤其主場發揮有保證，近3仗未輸過，乘勢搶上聯賽積分榜前半版位置。隊中幾位攻擊手演出值得留意，除咗有伊拜高美斯頻頻入靚波之外，新加盟嘅快翼祖尼都交到貨，至今已經貢獻4次助攻，成為球隊搶分嘅主力。踢開穩守突擊嘅艾拉維斯，呢場面對一味講求控球皇馬，絕對唔輸蝕，所以艾拉維斯下盤絕對係好路。
