今晚英超有場強弱懸殊之戰，熱刺續於溫布萊球場迎戰卡迪夫城。新敗嘅熱刺谷埋成肚火，遇上完全唔夠班嘅卡城，贏波應該冇難度，不過門神洛里斯復出以嚟頻頻蝦碌，今場未必保得住清白之身，轉捧中位數2.5球入球大好過。
（Now 621周六晚10時直播）
熱刺喺剛周中歐聯激戰到尾，最終以2比4輸畀巴塞隆拿，雖然係技不如人，但去到末段撳住對手嚟砌幾乎追得番，點知轉過頭輸多粒，其實有啲唔抵。好彩射手哈利卡尼弗爆，近4場入4粒，難得撞正弱旅卡城，實當佢係出氣袋喇！卡城又確係爭唔落，今季升班後，聯賽連盃賽未贏過之餘，最近5場更加輸晒，球員信心盡失，明顯未夠班踢高水平賽事。
卡迪夫城入得失得
老老實實，熱刺今場應該贏梗，不過佢哋嘅隊長兼門神洛里斯，之前受到酒後駕駛醜聞及傷患困擾，上場對巴塞復出又發波瘟，自己犯錯搞到開波冇耐已經失波，踢到中段亦試過出迎失誤，賽後洛里斯都話自己需要更加專注比賽，睇嚟呢位法國勇奪世盃功臣唔多弗，隨時成為熱刺防線計時炸彈。睇番卡城雖然5連敗，但有4場都有士哥，而且今場主勝賠率奀到暈，不如轉捧2.5球嘅大盤。
