今日賽事唔多，阿King依然搵到好嘢，其中聽朝美職獨腳戲西岸對決，西雅圖海灣者主場對侯斯頓戴拿模最有心水。海灣者擺脫早前忽然跌Watt嘅勢頭，為保季後賽資格不容有失，撞正客場蟲嘅戴拿模贏得，就算讓一球照捧上盤。
（Now 638、有線654及614台周二早上10時30分直播）
海灣者原本氣勢如虹，一度9連勝弗到漏油，但喺9月中突然跌Watt，接連輸畀費城聯同洛杉磯銀河，好彩上場大勝科羅拉多急流4粒，終止跌勢，依家佢哋喺西岸排第5位，領先「7哥」銀河2分，兼且打少2場，今場再贏就有利其保住前6嘅季後賽資格，一定搏到盡。另一邊廂，喺西岸排第10位嘅戴拿模，現時落後「6哥」皇家鹽湖城11分，想玩季後賽機會非常渺茫，而且佢哋作客奇差，今季14場聯賽客場，贏得1場咁大把，其中8場輸波，曳到冇朋友，加上近6次造訪西雅圖輸咗5場，今場凶多吉少，讓球盤海灣者讓一球都冇有怕，照捧上盤。
科隆遇弱又起筷
至於德乙1哥科隆主場對杜伊斯堡，兩軍近況差天共地，科隆近6場聯賽豪取5勝1負，其中4場至少贏2粒，前鋒泰路迪更頻有士哥，相反，杜伊斯堡開季後未開齋之餘，更輸咗6場曳到爆，不妨直取上盤。最後係西乙薩拉戈薩主場奧沙辛拿，雙方同屬中游近況都麻麻，不過奧沙最鍾意玩拉布，近5場全開半場和，值得追多鋪。
