由於踏入國際賽期，今晚都係以二線波為主，不過一樣難唔到阿King，其中英錦標有場越級挑戰，英乙仔燦美爾作客對英甲球隊梳士貝利。雖然梳士貝利級數較高，但呢班波守強攻弱，尤其初段最鍾意玩拉布，面對死守嘅燦美爾，半場隨時冇交收，半場和值博。
（周三凌晨2時開賽）
呢場係英錦標北部D組賽事，梳士貝利喺英甲只排中下游，開季後12場聯賽有6場打和，而且僅失11球，係其中一支失球較少球隊，而且佢哋擅於玩拉布，連盃賽在內，近8場有6次開半場和，包括首場英錦標以1比1賽和曼城U21，踢法穩中求勝。越級挑戰嘅燦美爾，今屆首場英錦標不敵克魯，為咗有分落袋唔敢亂攻，預計初段會陷於膠着，半場和有計。
樸茅撻着夠贏卡維尼
至於英錦標南部A組賽事，英甲「1哥」樸茨茅夫作客英乙仔卡維尼。樸茅雖然日前聯賽敗陣，但以比列比文、加利夫伊雲斯、查馬路維及路蘭居迪斯為首嘅攻擊線，火力全開，加上近5次對卡維尼贏晒，今場有力反客為主。最後係聽朝巴甲賽事，保地花高對華斯高，保地花高剛於南球盃擊敗巴希亞晉級，氣勢正盛，華斯高近10場作客未贏過兼輸咗7場，主勝有計。
