羅拔仔缺態 C朗冇入選
歐洲國家聯賽今晚重燃戰火，其中最為矚目係A3組賽事——波蘭主場迎戰葡萄牙。波蘭隊長「羅拔仔」羅拔利雲度夫斯基延續世盃低迷狀態，今季嚴重跌Watt唔見咗對射門鞋；至於葡萄牙亦未有徵召隊長基斯坦奴朗拿度（C朗），預計今場唔慌多波入，轉捧2.5球入球細仲好路。
（有線662及602台周五凌晨2時45分直播）
今夏以種子隊身份出征世盃嘅波蘭，竟然喺分組賽包艇出局，演出令人失望，其中隊長「羅拔仔」羅拔利雲度夫斯基更3場都食白果。波蘭雖然之後換帥，由名宿謝斯比斯錫接手，可惜首場歐國聯亦被意大利逼和1比1，查實波蘭「黃金一代」的確年事已高，特別係「羅拔仔」今場係第100場為波蘭披甲，跌Watt最為嚴重，佢今季為拜仁慕尼黑披甲已經踢得好沉，若果單計國際賽的話，呢位鋒將近5場都冇波入。需知道波蘭一向靠「羅拔仔」數胡，佢冇料到自不然拖累球隊火力大減，睇番近3仗只入3球兼失2球，全開總入球2球或以下，可見一斑。
王牌缺陣踢得保守
至於葡萄牙同樣鋒力疲弱，佢哋前線一直靠C朗單天保至尊，但呢位隊長連埋今次在內，連續2次國際賽期都未獲徵召，惟有倚靠西維爾前鋒安達施華與曼城鋒將貝拿度施華等後起之秀孭飛。何況葡軍主帥費蘭度山度士重視防守，上場歐國聯同樣缺少C朗，但靠穩守突擊小勝意大利1比0，連埋之前熱身賽打和克羅地亞1比1，冇C朗嘅葡軍踢得更小心謹慎，造訪冇晒火嘅波蘭，隨時悶戰一場，2.5球入球細乃不二之選。
