周五凌晨歐國聯尚有B2組賽事，俄羅斯主場迎戰瑞典。俄羅斯承接世盃餘威，近2場國際賽先後擊敗土耳其及捷克；相反瑞典吞下2連敗，防線合共失5球，好彩中場靈魂科斯貝治狀態回勇，今場有本錢同俄羅斯鬥攻，一於捧中位數1.5球半場大。
（有線618周五凌晨3時45分直播）
科斯貝治領瑞典鬥攻
俄羅斯於今夏世盃以東道主身份出戰，表現一鳴驚人，以機動快速嘅高效率足球成功打入8強。世盃後呢支「東歐鐵騎」保持強勢，先喺歐國聯首場分組賽作客以2比1擊敗土耳其，再喺熱身賽大炒捷克5比1。連同上述2場比賽，俄羅斯近5場比賽全部喺換邊前與對手加埋至少都有2球交收，全開半場大，盡顯急先鋒本色。
瑞典世盃後防線崩潰，先喺熱身賽淨吞奧地利2蛋，然後首場歐國聯分組賽更喺主場領先2球之下，最終以2比3反輸畀土耳其，反映出防線漏洞甚多。猶幸喺世盃表現令人失望嘅中場靈魂科斯貝治，今季德甲開季後表現回勇，帶領ＲB萊比錫取得佳績，今場有科斯貝治壓陣嘅瑞典，夠晒條件同俄羅斯鬥攻，預計今場兩軍踢法以快打快，隨時上半場已有不少入球出現，1.5球半場大有3.25倍值得捧場。
