閉門賽格仔軍氣數已盡
歐洲國家聯賽A4組大戰，周六凌晨有克羅地亞主場同英格蘭重演2018世盃4強戲碼。「格仔軍團」自世盃爆冷拚死闖入決賽之後，近期表現明顯下滑，加上今場要閉門作賽，主場優勢唔算明顯，面對有多位弗爆新星壓陣嘅「三獅軍團」未必有力搶分，平手盤捧英格蘭好過。
（奇妙電視77台、有線602及662台周六凌晨2時45分直播）
克羅地亞今仗雖然係坐鎮主場，不過就唔畀球迷入場助威，皆因球隊喺2016歐國盃外圍賽面對意大利期間，主場草皮上出現具爭議性嘅納粹標誌，結果畀歐洲足協捉到正，雖然克羅地亞足總已經作出道歉兼譴責事件，不過處分點都打唔甩，今場惟有閉門作賽。
克羅地亞近仗跌Watt
其實「格仔軍團」啱啱喺今個夏天嘅世盃有超水準發揮，歷史性首次打入決賽，雖然最終不敵冠軍法國，飲恨而回，不過成功達至自我突破，演出令球迷留下深刻印象。可能喺世盃創佳績搏得太盡，克羅地亞喺世盃過後狀態明顯陷入低潮，繼熱身賽遭葡萄牙逼和之後，上仗歐國聯仲畀西班牙以0比6羞辱，表現和世盃期間明顯判若兩隊。尤其球隊一直對莫迪歷和拿傑迪錫等老將過於依賴，人才斷層情況嚴重，加上波索域同維沙積高兩位效力國際米蘭嘅球隊主力因傷缺陣，克羅地亞今場戰鬥力難有保證。
查頓辛祖新星爆發
相反英軍今次召入唔少年輕球員，包括弗到漏油嘅新星查頓辛祖；呢位曼城青年軍出身嘅18歲攻擊手，自從加盟多蒙特之後，表現令人眼前一亮，令一班三獅球迷又可以對國家隊未來有所憧憬。有佢搭住近期腳風順番嘅英軍頭號射手哈利卡尼，英格蘭前場火力有保證，為報世盃4強被淘汰嘅一戰之仇，今場一班三獅球員肯定會出多幾成力，睇好佢哋作客照搶，英格蘭平手盤捧得過。
