沙基利牛一夏薩特贈興
今晚歐國聯A2組上演榜首大戰，由「歐洲紅魔」比利時主場迎戰瑞士。比利時王牌「夏神」夏薩特弗到爆燈，近期開竅頻頻入波，夥拍盧卡古、梅頓斯所組成嘅鋒線，火力強勁，瑞士好難頂得住佢哋嘅狂轟猛炸，讓球盤比利時讓1/1.5球，上盤抵玩。
（有線603及604台周六凌晨2時45分直播）
歐洲紅魔近仗有鑊氣
兩軍同樣喺首輪旗開得勝，不過今夏世盃獲得季軍嘅比利時實在太弗，尤其係王牌夏薩特，今季開竅幫車仔不停入波，單計聯賽已經入咗7粒，排緊射手榜榜首。唔單止喺車仔咁醒，佢為國出征一樣咁勁，近26次為「歐洲紅魔」披甲，一共攻入13球及奉獻13次助攻，即係話佢製造咗26個入波，表現堅搶鏡，連同前鋒盧卡古、梅頓斯、恩歷克卡拉斯高等做配合，令「夏神」發揮更加如魚得水。
瑞士雖有10月10日「牛一」、踏入27歲嘅梳頓沙基利、格列沙加、列卡度洛迪古斯等助陣，但始終整體質素唔及比利時，而且呢班「十字軍」作客強隊即刻腳仔軟，之前造訪英格蘭、葡萄牙都輸波收場。睇番比利時近3場全勝之餘，全部皆贏2球或以上，兼且保持清白之身，稱得上攻得又守得，今場可乘勢再下一城，上盤有計。
