難忘88年朗奴高文羞辱
今夜歐國聯A1組爆發宿敵大戰，由荷蘭主場火併德國。雙方牙齒印甚深，荷蘭主帥朗奴高文曾用冇品行為羞辱德軍，仇人見面分外眼紅，今番碰頭勢必火花四濺，加上近年交鋒常演入球騷，為攞彩兼落對手面，新仇舊恨一朝清，必定火力全開鬥攻爭勝，中位數2.5球入球大更值博。
（奇妙電視77台、有線662及602台周日凌晨2時45分直播）
兩軍積怨由來已久，從1974年世盃，當時嘅西德於決賽爆冷以2比1擊敗不可一世嘅荷蘭捧盃開始，去到1988年歐國盃輪到荷蘭封王，當時佢哋喺4強以2比1反勝西德，賽後中堅朗奴高文拎住啱啱交換到手嘅西德球衣擦屁股，羞辱對手，贏波輸品。依家朗奴高文出任荷蘭主帥，今場迎戰死對頭德國，勢必令火藥味更重。查實朗奴高文都要重建「橙衣軍團」，佢哋喺歐國聯首輪雖以1比2不敵法國，但以迪比、賴恩巴布為首嘅鋒線表現唔曳，並有新星、古華特囝囝祖斯甸古華特候命，中前場火力不容小覷。
近10仗國際賽9場失波
另一邊廂，德國經歷今夏世盃分組賽出局嘅羞家表現後，意外獲得留低嘅勒夫，為保烏紗亦要變通，呢位以前鍾意玩無鋒陣嘅教頭，今次召入史浩克04前鋒烏夫，而迪姆華拿近排喺RB萊比錫亦回勇，佢希望用入波鞏固自己正選地位。不過德國有夏維斯、馬高列奧斯及魯迪格因傷臨時退隊，陣容不整，近10仗國際賽只得1場保持冇失波，防線唔多穩陣。加上兩軍都想贏波攞彩，隨時大駁火，近4次交手又有3次開3球或以上，鬥攻格局一於捧大盤。
