全攻踢法勁旺入波
日聯盃周日上演4強次回合，4大勁旅再度交鋒力爭決賽席位。頭場鹿島鹿角首回合主場輸1比2，今場作客橫濱水手勢必豁出去鬥攻。尾場湘南比馬今季日聯盃主場特醒，有力殺敗柏雷素爾，平手盤值博。
先講頭場水手主場迎戰鹿角，水手今季進攻大過天，29場聯賽共入52球及失49球，總得失球數字冠絕日職之餘，轉戰盃賽亦進攻至上，連同首回合作客贏鹿角2比1在內，近9場日聯盃合共炮製36球，8次開3球或以上，稱得上係大盤客恩物。
柏雷作客腳軟益晒比馬
事實上，水手鋒將近況勇銳，其中首回合補時絕殺嘅曉高韋拉近3場入4球，另一名射手仲川輝人近2次於主場亦有3球斬獲，不過佢哋近9場日聯盃8場有失波，防線充滿隱憂，火力有番咁上下嘅鹿角落後1球亦唔會坐以待斃，今場捧中位數2.5球大最穩陣。（有線602及662台周日下午1時直播）
尾場湘南比馬主場再鬥柏雷素爾，比馬今季喺主場出戰日聯盃特醒，5場取得4勝1負，其中4次贏波都係0失球；相反柏雷素爾每逢盃賽作客，戰鬥力隨即打折，連亞冠盃、日皇盃及日聯盃在內，佢哋5次出訪只得1和4負劣績，合失11球，平均每場失2球以上，今場造訪比馬唔易踢，平手盤必捧比馬。
（有線602及662台周日下午3時直播）
