新舊羅拔仔拍檔煞食
今晚歐國聯A3組大戰，波蘭喺主場硬撼意大利。意大利已經有接近1年未曾喺正式賽事贏過，新帥文仙尼又冇料扮四條亂咁試陣，續用恩斯治尼裝「假9」簡直嘥料，相反波蘭「新羅拔仔」比亞迪克腳風順到冇朋友，主場出擊仲有得受讓咁筍，梗係捧讓球主勝。（有線662及602台周一凌晨2時45分直播）
意大利新帥文仙尼冇橋
兩軍首輪交手，當時佔地利嘅意大利，僅靠佐真奴費路操刀12碼追和1比1，表現認真麻麻。唔計無關痛癢嘅熱身賽，意大利上次喺正式賽事贏波，要數到上年10月初世盃外贏阿爾巴尼亞，意味着「藍衫軍團」近1年未試過喺正式賽事獲勝，係佢哋60年來最差紀錄。就算新帥文仙尼喺今年接手，但佢始終未定出清晰戰術，搞到係咁試陣，今次棄用愛將巴洛迪利，日前熱身賽對烏克蘭，改打無鋒陣搵弗爆嘅恩斯治尼裝「假9」，配合貝拿迪斯治同費達歷高基艾沙攻堅，但效果一般，最終被逼和1比1，似乎文帥冇乜計喎。
波蘭比亞迪克11場入14粒
雖然波蘭前鋒兼隊長羅拔利雲度夫斯基，近期係咁食白果，但日前熱身賽不敵葡萄牙交出助攻，狀態好番啲。當然不得不提佢拍檔比亞迪克，對葡萄牙嗰場取得國際賽首個士哥，呢位熱拿亞前鋒，喺今季意甲場場有波入，以9球排緊射手榜榜首，連埋意盃同國際賽，近11場狂轟14粒，難怪被稱為「新羅拔仔」，弗到漏油。何況比亞迪克喺意甲搵食，對「藍衫兵團」有一定了解，仲有利雲度夫斯基做掩護，更加方便數胡。況且意大利近4場作客3度輸波，波蘭有得受讓必捧讓球主勝。
