連勝心雄強攻烏拉圭
亞洲三強日本、南韓同中國齊齊喺主場踢熱身賽，一於整番條亞洲3串1玩吓！日本主場迎戰烏拉圭，「藍戰士」喺新領隊森保一領軍下，連續2場以3比0大炒哥斯達黎加同巴拿馬，信心爆棚，不過今場對手烏拉圭實力比兩者明顯高一班，加上烏拉圭剛戰不敵「太極虎」南韓，今場更要打爭氣波，日本近4次對南美洲球隊總入球全開3球或以上，今場吼中位數2.5球入球大更佳。
（有線662及602台周二晚6時35分直播）
日本於俄羅斯世盃後改由森保一掌帥印，近2場熱身賽先後以3比0擊敗哥斯達黎加及巴拿馬，其中2名為國家隊上陣不足10次嘅小將南野拓實及伊東純也都連續2場有士哥，前線收到練兵之效。
國足死火吼「半和」
不過日本今場對手烏拉圭現時世界排名第5，於南美洲排名僅次巴西，戰鬥力遠勝哥、巴，預計日本後防今場將會遇到較大壓力，未必可像上2場般保持清白之身，尤其烏拉圭上仗不敵另一支亞洲勁旅南韓1比2，為免連續2場失威，今場料不會放軟手腳，球隊有召入巴黎聖日耳門前鋒卡雲尼，其高大身材及爆發力對日本後防必定帶來威脅，相信今場入波唔會少。
至於南韓對巴拿馬，巴拿馬上周以0比3不敵日本，球隊遊埠心態嚟亞洲，相反「太極虎」見到日本大勝巴拿馬，當然要炒得多過日本，有孫興民助陣，今場揀南韓「讓球主勝」。最後中國對敍利亞，雙方近況都一般，中國近3場零入球，好彩近2場冇失波，國足主帥納比今場都唔想失威，以佢穩陣性格，半場應該都係守住為大前題，揀半場和啱數。
