炒完德國士氣高昂
今日除咗歐國聯賽事，仲有多場國際熱身賽上演，其中「歐洲紅魔」比利時會喺主場鬥「橙色兵團」荷蘭。「橙色兵團」上場歐國聯以3比0大破宿敵德國，士氣、信心爆晒棚，加上佢哋客場出戰熱身賽表現特別醒神，對上10場作客熱身賽一共攞到7勝3和不敗成績，今場受讓必捧讓球客勝。
（有線603及604台周三凌晨2時45分直播）
荷蘭上場歐國聯喺主場以3比0擊敗德國，除咗取得今屆歐國聯首場勝仗，仲創下咗佢哋歷來對德國嘅最大比數勝仗，一吐近年無緣進身大賽決賽周嘅烏氣，對於今年2月先接手嘅領隊朗奴高文嚟講，絕對係一個肯定。荷蘭雖然接連缺席2016歐國盃同2018世盃兩個重要比賽，不過講到踢熱身賽就難唔到佢哋，由2015年尾開始起計，荷蘭對上10場作客國際熱身賽從未輸過，一共攞到7勝3和，當中對手包括英格蘭等勁旅，今次承接上場贏波餘威，有力繼續保持呢個優勢戰績。
比利時勢用副選應戰
比利時上場歐國聯同樣贏波，憑盧卡古梅開二度，主場以2比1擊敗瑞士，目前喺歐國聯2戰全勝排榜首，現階段可鬆一鬆，事關喺緊周末歐洲各大聯賽重開，上場對瑞士踢足嘅盧卡古、夏薩特及韋素等主力今場好大機會被收起，預計巴舒亞伊、杜根夏薩特、費蘭尼等副選有機會落場，整體戰鬥力或打折扣，面對「托弗」嘅荷蘭唔易踢，比利時讓波寧揀讓球客勝。
