周二另一場重量級熱身賽，南美宿敵巴西、阿根廷會喺中立場沙特阿拉伯拍跳。巴西對待熱身賽態度認真，連同上場2比0擊敗沙特阿拉伯，近7場熱身賽保持全勝兼冇失波；阿根廷正處重組期，冇美斯領軍戰鬥力同巴西差一截，主勝有買趁早。
（周三凌晨2時開賽，馬會網上文字直播）
森巴兵爭上位必搏命
巴西上場熱身賽雖然對住實力較弱嘅沙特阿拉伯，不過領隊迪迪依然強陣出擊，尼馬、菲臘比古天奴、加比爾捷西斯及卡斯美路等主力全部正選落場，完全貫徹巴西近年應付熱身賽嘅認真態度，始終巴西好球員太多，唔透過熱身賽去試陣，真係唔知邊啲球員狀態好，所以一眾邊緣正選球員好似羅拔圖法明奴、李察利臣、盧卡斯莫拉等等，一定把握機會表現自己，上陣唔會揸流攤。
阿根廷喺今夏世盃16強出局，由史卡朗尼接替森柏奧利領軍，至今踢咗3場熱身賽攞得2勝1和，不過2場贏波對手分別係中北美洲球隊危地馬拉及亞洲代表伊拉克，實力唔算強，贏波不足為據。目前阿根廷正處新舊交接期，美斯、阿古路、希古恩、迪馬利亞及班尼加等老將繼續落選，取而代之嘅保羅戴巴拿、莫路伊卡迪或基奧雲尼施蒙特，喺合作性同默契方面，同夾慣夾熟嘅巴西差一截，今場一於捧1.53倍嘅巴西主勝。
