殘陣態沉 知錯唔改
歐洲國家聯賽A1組爆發大戰，應屆世界冠軍法國主場迎戰上屆冠軍德國，德軍啱啱喺阿姆斯特丹慘吞荷蘭3蛋，全隊表現低迷，領隊勒夫面對全國質疑，最慘仲係殘陣出擊之餘，仲有多位主力嚴重缺態，今仗被迫大變陣，去到巴黎法國球場，幾難抵擋由基利安麥巴比、基沙文同基奧特組成嘅「3基鋒線」，法國主W低開至1.68倍係信心飛，一於跟番注。
（奇妙電視77台、有線662及602台周三凌晨2時45分直播）
保定退隊兵源買少見少
德國3日前作客荷蘭慘敗後，被傳媒猛批並冇吸取世盃失敗教訓，雖然棄用咗箭頭馬里奧高美斯同防中基迪拉，但進攻瓣數依然睇唔到任何改善，防中用單薄嘅甘美治代替基迪拉，更被彈係重複當年用拿姆踢呢個位置嘅錯誤。目前嘅勒夫似足曼聯「寸王」莫連奴，無論戰術同應變都回晒塘，國家隊亦似足近期嘅拜仁，除咗浪費時間搓波之外，攻防都慢，問題多多，狀態遠離水準。勒夫上輪輸完，亦歸咎傷兵同狀態問題，事實上馬高列奧斯、根度簡、魯迪格、夏維斯同哥列斯卡等賽前傷退，已經對兵源構成打擊，對荷蘭後，中堅謝路美保定亦因小腿肌肉受傷加入退隊行列，勒夫可用嘅兵源真係買少見少。
迪甘斯試完新人排強陣
至於法國隊雖然以兩戰得4分進佔A1組榜首，但近期表現其實唔算突出，啱啱喺主場仲好艱難咁逼和弱旅冰島，領隊迪甘斯喺攞咗世盃冠軍後不斷試新人，亦令球隊演出較為飄忽。不過今場係連續主場出擊，收以逸待勞之利，對手又係名氣重量級嘅德國，預期迪甘斯會出番強陣，前線由「準球王」基利安麥巴比帶領嘅3基組合威力十足，信賴佢哋唔想令首都球迷失望，應該有足夠戰意擊退動蕩中嘅德軍。
